هذا رايى ولم اكتبه لاقنعكم به بل كتبته لمجرد ان تعرفوه..
فى البداية احب ان اوضح انى ليس لى اى انتماءات سياسيه لاى حزب وخصوصا الحزب الوطنى كما اتهمنى البعض :))
.. وليس لى اى انتماء لاى جماعات وخصوصا الاخوان ومعنديش اجندات غير اجندة مذكراتى :))
...............................
بدايتا اصبح اسهل شىء فى الايام الماضيه ان نتهم بعضنا البعض بالالقاب انت عميل ...انت بلطجى... انت حزب وطنى...
واصبحت حزب وطنى كانها سبه فى حق الوالدين مع ان لو نظرنا لتاريخ الحزب الوطنى القديم انه مصطفى كامل هو اللى اسسه زمان لمحاربة الاحتلال واننا اما بنعتبره سبه بنضيع تاريخ ومجهود لشخص مات فى حب هذا الوطن ومجهوده كان لا يقل عن ثوره 25 يناير ...
زى ما بالظبط بنيجى نقول مصر وحشه وحنهاجر برا هو شتم مصر مشتمشى طباع الناس اللى خلوها وحشه...
مصر جميله فيها ناس وحكومه بوظوها والحزب الوطنى اللى اسسه مصطفى كامل جميل وهدفه كان حر لكن الاعضاء اللى مسكوه دلوقتى هم اللى بوظوه ....
ولابد ان يحاكموا على افساد تاريخ هذا الحزب...
فارجوكم حينما تلقون التهم بالناس خدوا بالكم ان زى ما حترمى اللى قدامك بتهمه هو ايضا حيرميك باخرى وان الاصل لكل الثورات هى الديمقراطيه والديمقراطيه هى احترام الراى الاخر وعدم اتهامه بما ليس فيه....
.....................................
ندخل فى لب الموضوع
يتعجب منى الكثير عندما اقول لهم انى لا اريد البرادعى رئيسا لى ثم يتقاذفون معى بكلمات انتى حزب وطنى....
دا عالم ذره... اللى طلع عنه دى اشاعات ...دا رمز من رموز مصر عشان واخد نوبل.....
مبدئيا موضوع سبة الحزب الوطنى والتشكيك فى نزاهة الناس لمجرد رايهم المخالف انا تحدثت عنه فوق ...
...........................
تانى شىء محدش يقولى عالم ذره لحسن اولع فيه واحب احطلكم لينك البرادعى عشان تعرفوا هو مين قبل ما تقولوا عالم ذره هو قد يكون عالم لكنه عالم قانون وليس عالم ذره
يعنى انا مش عشان اتعين فى وزاره الصحه اعملهم بوسترات وانول ترقيه وامسك منصب عشان انا شاطره فى مجالى الفنى تقولوا عليا انى طبيبه .....
لا حبقى عالمه بس فى مجالى الفنى مع بعض الخبرات عن الطب لكن مش حبقى طبيبه....
دى سيرة البرادعى الذاتيه وهى كما ارى وسترون مشرفه يعنى مش شايفه فيها مشاكل خالص....
..........................
تالت شىء الاشاعات اللى طلعت عنه سواء صحيحه او خاطئه هو حر فى حياته من شاء فليؤمن ومن شاء فليكفر يشربوا خمره مش مشكلتى مش محجبات مش مشكلتى يلبسوا مايوهات ويتجوزوا انجليز هم حرين .... ومش من حق حد يتحشر فى خصوصياتهم لان خصوصياتهم متخصناش .....
لانه مجرد رجل مصرى ومش رئيس جمهوريه
..........................
رابعا نيجى عند جائزة نوبل ونقف عندها شويه هل جائزة نوبل فى الآونه الاخيره هى جائزة نزيهه بما فيها الكفايه؟؟
...............................
طيب ممكن اسال باراك اوباما عمل ايه عشان ياخدها اول ما يمسك الحكم فى امريكا ايه جهود باراك اوباما العالميه حتى الان؟؟؟
........................
جائزة نوبل فى الاونه الاخيره ونقلا عن العالم المصرى فاروق الباز عندما سالوه عن عدم تلقيه لتلك الجائزه حتى الان فقال هى جائزة سياسيه من الدرجة الاولى وتعطى لمن له توجهات سياسيه معينه وانا توجهاتى السياسيه متعجبشى امريكا ... وجميعنا يعلم صراحة هذا الرجل ...
..............................
حد فتك ييجى يقولى امريكا مش هى اللى بتديها معلشى انا اقوله امريكا هى اللى بتدى كل حاجه وبتعمل كل حاجه فى الزمن دا...
الدليل على صحه كلام دكتور فاروق الباز هو سفر الدكتور احمد زويل لاسرائيل لتلقيه تكريم من هناك
قبل ما ييجى مصر عشان يتكرم ولما سألوه فقال لهم ان العلم ليس له وطن ...
..............................
اه يا بتاعة الحزب الوطنى يالى بتسمعى كلام الناس ... لا معلش الموضوع دا بالذات انا فاكراه قوى من وانا صغيره وقبل ما يقول حرشح نفسى لرياسه وقبل اشاعات الحزب الوطنى ما تطلع ....
.............................
ايوه يعنى بترغى عاوزه ايه عاوزه اقول ان احيانا تلك الجائزه بتعطى :
ساعات اما واحد يكون مع امريكا واسرائيل ومع سياستهم ...
ساعات اما يكونوا عاوزين يسكتوا حد عن حاجه فبياخدها مقابل...
ساعات يحبوا يجاملوا حد وخلاص...
..........................................
انتى عماله تعجنى بقالك ساعه عاوزه ايه ؟؟؟
عاوزه اقولكم ليه مش موافقه على البرادعى ؟؟
.........................................
طيب خلينى اقولهالكم فى عدة نقاط:
1 لمن يقولوا ان البرادعى كان ضد الملف النووى فأسالهم سؤال لو البرادعى كان ضد امريكا فعلا كيف حصل على جائزة نوبل؟؟؟
اذا كان فعلا وقف فى وش امريكا فهل حد بيقف فى وش امريكا وبيفضل حى حتى الان على قيد الحياة ويكرم ؟؟؟
راح فين الدكتور يحيى المشد؟؟
راحت فين الدكتورة سميره موسى والدكتور سمير نجيب والدكتور على مصطفى مشرفه والدكتور جمال حمدان ....
وغيرهم والقائمة تتسع لاسماء عدة كانوا ضد امريكا وضد اسرائيل ...
..................................
ملحوظه انا لا انكر مجهوده لينول جائزة نوبل لكنى انكر ان مجهوده وحده هو كان سبب اخذه للجائزه
وان من يأخذ نوبل له توجهات سياسيه موازيه لامريكا واسرائيل فى غالب الاحيان وليس على الاطلاق
.............
2 نال البرادعى جائزة وشاح النيل المصريه وسلمها له الرئيس السابق حسنى مبارك وهو يختلف معه كما يزعم فى سياساته وتقبل البرادعى تلك الجائزه وقال انها افضل من نوبل عنده عشان تكريم بلده ليه...
لماذا لم يقم برد الجائزه كما فعل بهاء طاهر ولو كانوا اهدوه جائزه مبارك بدل النيل هل كان حيرفضها ولا حيردها فى وقتها ؟؟؟
.............
3 صرح البرادعى منذ حوالى عام انه ينوى ترشيح نفسه فما الذى فعله من خطوات ليستحق مثل هذا المنصب ؟؟؟
اول شى قاله بعد انه حيترشح انه فى شروط ليترشح...!!
شروط على مين على المصريين دا المصريين هم اللى المفروض يتشرطوا على الرئيس اللى حيمسكنا هو احنا لسه حنتحكم بشروط تانى ...؟؟
اول شروطه لجنه من الخارج تشرف على الانتخابات طيب ماذا فعل هو عشان يترشح؟؟
لا اشترك فى حزب ولا عمل حزب ولا كتب فى جرايد ولا شوفته اشتغل فى العمل الحر ولا شوفته اتمرمط زى الاخوان وطلع عينه
(حتى لو مختلفه مع الاخوان بشهدلهم انهم اكتر ناس اتبهدلوا فى قول كلمه الحق فى وجه جائر ايا كانت نيتهم وقتها)
ايه هى كلمه الحق اللى قالها البرادعى فى وش مبارك ؟؟
خاف يقولها لوحده قام انتظر بعد قيام الثورة جه ياخدها على الجاهز ... فين البرادعى من وائل الابراشى
وابراهيم عيسى المغضوب عليهم من النظام السابق ؟؟
اين البرادعى من احزاب المعارضه؟؟ اين البرادعى من قول كلمة الحق فى وجه سلطان جائر...؟؟
افرضوا لو مكانتشى الثوره قامت؟؟
ومكانشى الدستور حيتغير كان حيعمل ايه؟؟
اللى صحيح بيسعى لانه يخدم الناس ميستناش انه يمسك رئيس جمهوريه .. لا بيبدأ العمل ويشترك فى الخير بايده اكتر من فلوسه ويتعب عشان اما يوصل يتقى الله ...
......................
4 الرئيس اللى المفروض يحكمنا لازم يبقى عاش وسطنا داق الفقر اللى الناس داقوه وشاف الغلب اللى شافوه وتعب واتسجن من النظام السابق وكان ليه كلمة حق مشهوده مش يسكت لمائه عام ثم يخرج علينا الان بنصايح وعبر وكانه الحاكم الاعظم والمخلص المنتظر.. اين البرادعى من احوالنا من مشاكلنا من عاداتنا وتقاليدنا؟؟؟
على راى دكتور فاروق الباز ان جيلهم فشل فى تحقيق اهدافه فلا ياتى البعض من الفاشلين الان ليتسلق على الثوره .
.....................
5 هل البرادعى وما اعتاد ان يعيش عليه فى الخارج يتناسب مع عاداتنا الاسلاميه والمسيحيه؟؟
انا قولت انى لن اتدخل فى حياته الشخصيه طالما هو ليس رئيس جمهوريه لكن اما يبقى رئيس جمهوريه لابد ان يمثل اغلبيتنا هو حيكون واجهه مصر فهل ينفع يبقى واجهه مصر..؟؟
.....................
6 وبكل صراحه انا لن انتخب اى رئيس جمهوريه لديه زوجه وابنتين غير مجبتين ...
البعض حيقولى ايه التخلف اللى انتى فيه دا؟؟
لا معلش ارد رد تانى
بسبب عدم حجاب سوزان مبارك اما عمرو خالد طلع وانتشر وارتدت زوجه ابنها علاء الحجاب قلعوهولها بالعافيه وطرد عمرو خالد خارج مصر ....
بسبب عدم حجاب سوزان مبارك ممنوع واحده محجبه تشتغل فى التلفزيون المصرى و وطبعا سنتها طين لو اتحجبت لازم تتحاكم وترفع قضايا وتتحول ادارى....
بسبب عدم حجاب سوازن مبارك لازم المسلسلات والافلام يبقى 90 فى المائه منهم مش محجبات ويجيبلك 10 فى الميه دا اذا مكانشى صفر فى الميه محجبات فى لمسلسلات ...حتى اصبحت دول مثل السعوديه وليبيا والجزائر بيقولوا علينا شتيمه وحشه جدا على حرف ش ........... مقدرشى اقولها ...
بسبب عدم حجاب سوزان مبارك عشان تتولى منصب قيادى او وظيفه فى حاجه تبع الدوله او فنادق او بنوك يفضل غير المحجبه ...طبعا انا بقول المحجبات مضطهدات فى بلدنا فما بالكم المنتقبات دول مش مضطهدات دول فى حكم سوزان يولعوا بجاز ....
مع ان لو بصينا كويس حنجد ان حوالى 90 فى المائه من المصريات المسلمات محجبات ..
اصبحت المحجبه لو جت فى تلفاز يتقال متطرفه ولو صرحت انها لابسه الحجاب لدين تبقى نصيبه حتى فى الثوره اللى فاتت تعمد لعدم تصوير المحجبات فى بعض المشاهد فى الشوارع عشان يقولك انها مش ثوره دينيه ....
سامعه كم حد بيقولى البت دى شكلها اخوانجيه ....
لا مش اخوانجيه واخوانجى مش شتيمه اتسب بيها زى ما بيتسب الناس بالحزب الوطنى
.........................
بس من حقى انى اخد حقى فى بلدى ومن حقى انى اظهر فى الصوره ومن حقى ان حجابى او نقابى ياخد حقه ...اشمعنى اللى بيقلع نقول عليه حريه شخصيه اشمعنى المحجبه والمنتقبه مش حريه شخصيه ولا هو الحقوق فى القلع فقط؟؟؟
احنا بنخاف نتكلم بالدين عشان محدش يتهمنا ؟؟
من حقى ان اللى تمثل الاغلبيه تبقى مننا ..؟؟
انا عارفه ان فى بنات مش محجبات وقمه فى الاحترام وكلامى دا مش ضدهم ... وان فى بنات محجبات زى الطين وبرضو كلامى مش ضدهم .... لكن مهمش بيمثلونى قدام العالم ..!!؟؟
ثم ان غير المحجبه التى تعلم ان عدم لبس الحجاب معصيه ستتمنى ما اتمنى ...
وبتتمنى ان ربنا يديها الشجاعه لترتديه وربنا يهدينى ويهديها ...
وقد تكون هى بتعمل شىء افضل منى عند ربنا ...
لكن غير المحجبه اللى مبتعترفشى بالحجاب اصلا زى امثله بنشوفها فى المجتمع وبيطلعوا على التلفزيون يشتموا فى الحجاب دى ربنا معاهم بقى ومتفرضشى افكارها الخاصه علينا .....
.............................
يعنى انتى يا اسماء عاوزه ايه لا عاجبك برادعى ولا عاجبك زويل ولا عاجبك ايمن نور ولا اخوان امال مين يمسك امال مين عاجبك...؟؟
............................
بصراحه مش عاجبنى ولا حد ولا عاجبنى حتى نفسى ...!!؟؟
بحلم برئيس مسلم معتدل يتقى الله فى كل مصرى سواء مسيحى او مسلم
انا بحلم برئيس يكون بيحب مصر اكتر من ولاده ومن نفسه وفقير او غنى بس يكون راضى عشان ميسرقشى
.......................
بحلم بعمر ابن الخطاب رضى الله عنه عمر اللى خاف ان لو دابه فى العراق تعثرت ربنا يساله عليها .
اللى لما ارسل عمرو بن العاص لفتح مصر واراد عمرو بن العاص ان يبنى مسجدا واحضر له البنايين اعمده من المعابد والكنائس ارسل له عمر بن الخطاب رضى الله عنه رساله يخبره بان يعيد الاعمده الى اماكنها
ويخبر المصريين ان الاسلام لم ياتى ليبنى مساجدا بدلا من كنائسهم ومعابدهم ....
عمر بن الخطاب اللى لما فتح القدس امن الناس وامن الكنائس والارواح ولم تمتد يده لهدم كنيسه واحده.....
رئيس يمشى زى ما قال الرسول عليه الصلاه وافضل السلام لكم دينكم ولى دين ....
عمر الاسلام ما كان دين ارهاب ولا عاوز يبنى نفسه على غرار المسيحيين كما يخشى ويخاف البعض...
......................
عاوزه رئيس زى عمر بن عبد العزيز اول شىء امر بيه ان كل ما فى قصور الامراء يباع ويجمع ويوضع الى بيت المال للامه وبدأ بقصره حتى اصبح ينام على الخيش ...
......................
عاوزه حاكم بدل ما ياخد من مصر يديها بحب ...
عاوزه حاكم عادل يمشى فى وسطنا يرفع راسنا فى وسط الامم يرعى العلم والعلماء ويعطى كل زى حق حقه....
عاوزه حاكم يطبق الدين فى اسرته عشان يطبقه فى وطنه عاوزاه عنده اخلاق مش مجرد بيصلى عباده وبس
عاوز حاكم مكانشى اصلا عاوز يبقى حاكم بس ربنى اللى جعله حاكم فيعينه عليها ....
...........................
من الاخر عاوزه حاكم مش موجود فى الحياه دى لاننا اصلا مش على مستوى لا دينى ولا اخلاقى يتيح انه يطلع مننا هذا الحاكم الذى اتمناه ....
وعلى كل حال اتمنى من الله انه يبقى موجود....
...........................
والا حنضطر اننا نعيش فى انتظار عيسى ابن مريم عليه السلام حتى يحق الحق ويزهق الباطل ....
وبعتذر للاطاله...
