مش انا مكنتش ناويه اكتب حاجه ومش عارفه اكتب حاجه ومليش نفس اكتب حاجه بس بصراحه وربنا دمى اتحرق ...
هو عدم اللامؤاخذه احنا عندنا مجلس شعب ولا مجلس اعضاء الشعب..!!
يعنى اما بيتناقشوا كدا فى المجلس المفروض يناقشوا قضايا الشعب ..!!
ولا ياخدوا الجلسه شتيمه وقباحه من اولها لاخرها...؟؟؟
وهو يعنى على اد شوفى واعتبرونى جاهله ان المجلس مبيحلش مشاكل الشعب
دا عمال يسن قوانين فى مصلحه الحكومه وعمالين يجزروا فى الخلق طيب ما يسموه مجلس الحكومه احسن...
و ما الافضل نلغى مجلس الشعب خالص ...!!؟؟
طيب ما الاحسن نعملها ملكيه واهو العائله المالكه تاخد 75 فى الميه من موارد البلد زى السعوديه
والشعب راضى ب 25 فى الميه صافى منغير سرقه....
واعملوا معانا زى ما السعوديين بيعملوا معاهم....
طب بقول ايه ما نلم الشعب فى محرقه ونسيب كبارات البلد وبتوع المجالس يعيشوا فيها لوحدهم ..
واهو منها اما يمشوا فى مواكب مش حيحتاجوا يوقفوا المرور...
ويوفروا تمن البوديجاردات...
ويسيبوا كم الف خدام مننا يخدموا عليهم واهو كله بلقمته....
....................................
مفيش اكل ماشى نجوع بس بكرامتنا كمان مفيش كرامه ماشى صباح الخير يا جارى انت فى حالك وانا فى حالى
كمان مش عاوزينا نفتح بقنا ولا نقول جاااااااااااااااااااااااااااى
يعنى ناخد على راسنا ومنشتكيش دا فى حكم مين يعنى ...
طيب كانوا بيسيبونا نبعبع ونتكلم دلوقتى بقى لا بعبعه ولا حقنا ناخده....!!؟؟
..................................
وبتقولولى الدول العربيه بتهينا...
ما البركه فى بتاع مجلس الشعب والحزن الوطنى اللى قال اضربوهم بالرصاص واللى قال نديهم بالجزمه...
اما حكومتنا ومجلس شعبنا يقول نديهم بالجزمه والرصاص ويتكتموا ومش من حقهم يتكلموا
يبقى اللى برا يعملوا فينا ايه..
وطالع بيعتذر على كلامه .. ويقول فلتة لسان...!!؟
لا معلشى دا فكركم اللى بتعاملونا بيه ومش فارق تعتذر او متعتذرشى لان دا اللى انتوا فعليا بتطبقوه ومنغير اعتذار...
اما احنا اصلا ارتضينا المهانه فى نفسنا حنعتب على الدول العربيه ليه... ؟؟؟؟
بقول ليا وللمصريين اذا صحينا فى يوم وجدنا نفسنا سورى فى مزبله كبيره الكل بيهينا فلا نلومن الا انفسنا....
ودعوه للكبير فى البلد دى يا ريت تغير اسم مجلس الشعب
لمجلس منافقون ليكى يا حكومه...او مجلس عشانا عليك يا رب...
......................
كلمتى لن تحرك هفوه فى اى مكان بس ع الاقل فضيت غيظى
15 تحب تتجنن معايا!:
مهو للاسف يا سومة اللى قال نضربهم بالرصاص واللى قال نديهم بالجزمة نسى ان هما دول اللى لبسوه الجزمة والبدلة ومشيوا هما حافيين
وركبوه العربية واشعبطوا هما فى المواصلات
وسكنوه فى فيلل وهما فى عشوائيات اكلوه كفيار وهما فول وطعمية
ونسى ان لولا هما مكانش قعد على الكرسى ده ولا شافه
ربنا يعلهم يا سومة وهما على راى المثل معاهم معاهم عليهم عليهم
ويا اما مع الحكومة يا اما علينا
تسلمى على البوست
ووحشتينى
السلام عليكم
كيف حالك يا سومة .. والله زمان ..
اصبت بنفس حالتك عند مشاهدة جلسة مجلس الشعب اليوم وهم يناقشون موضوع نائب الرصاص وتوجيه اللوم له مثلما تفعل الحكومة اليهودية عند قتل فلسطينيين وتوجيه اللوم لجنودها ..
وما ينفعش نسميه مجلس عشانا علىك يا رب .. لكن ممكن نسميه مجلس انا حرامي ولا فخر وانتسب للحزب الواطي ..
تحيتي واهلا بيكي
لالا يا سومه مهو الراجل وجهولو تائنيب اهه يا عينى صعب عليا و حكومه ايه هو احنا عندنا حكومه احنا عندنا عصابه مرتشين و و مهربين و قروض و قمار و قله ادب
لو كان تنفيس الغضب و الغيظ هايغير حاجة أنا كنت مشيت بكسرولة علي راسي في الشارع و فضلت أشتم في الحكومة قدام مجلس الشعب و الشوري...
بس هقول ايه ياكش يولع الشعب و الشوري و النظام الحاكم من أوله لأخره...
وماله يا سومه
نفسى عن نفسك
ولا حتى نفسنى عن نفسك
هو فيه حد بياخد باله من حاجه
اصل احنا مجلس الشعب .. قصدى مجلس الحكومه لا لينا دعوه بالشعب ولا بأبو ام الشعب ابن الفرطوسى ده
اصل الشعب حبة حثاله واحنا قصدى بتوع المجلس ما بنعبرهمش
شعب ايه وزفت ايه .. المهم واحد بس من الشعب يكون راضى ومبسوط مننا
لكن الشعب دا حنديه بالجزمه على دماغ ابوه ولو قال أأأأأى نضربه بالرصاص الحى ومالوش ديه عندنا
طز فى الشعب مادام واحد بس راضى عننا
سلمى لى على ماما
مع الاسف محقة فى كل حرف وكلمة
متفق جدا معك قلبا وقالبا
لكن احنا نستاهل اكتر من كده لاننا اصبحنا سلبييين وانتهازيين واعطناهم الفرصة يعملوا فينا كده
ربنا يولع فيهم ان شاء الله
تحياتى
السلام عليكم
ندعوكم لمشاركتنا حملة إصلاح الجيل من أجل التحرير .
(حملتنا حملة أفعال مش بس كلام )
ونرجو منكم وضع لوجو الحملة فى المدونة
والتفاعل مع الحملة
ونفع الله بنا وبكم الأسلام والمسلمين
http://forelaqsa20.blogspot.com/
شكرا لتعليقاتكم جميعا وتبقى الجراح كما هى
ان تكون بلادنا هي ذاتها محرقة لنا هو العبث بذاته .. فأين لنا من وطن بعد ذلك؟
هم اعداء للشعب ولا يحبون الشعب .. ولا دليل على عكس ذلك
----
انتي نشرتي بوست بعد كده وبعدين مسحتيه؟
مراكبى انا ممسحتوش انا بالغلط وانا بعدل في المدونه دوست عليه مسوده بدل نشر
المدونة رائعة شكرا لك ..
استاذ محمد
انا اللى شكرا لك ونورتنى
شكراااااا على مدونتك الرائعة
مدونتك رائعة .. اعدك بالزيارة الدائمة انشاء الله .. كل التوفيق
شكرا جزيلا علي مدونتك الرائعه
إرسال تعليق