ما كشفته المحنه..!!؟

احب الخصها فى عدة نقاط عشان مرغيش كتير

صفات الشعب المصرى:

1غلابة اوى

2 طيبين جدا

3 بينضحك علينا بسرعة

5عنديين جداا

6 منحبش حد يتحشر فى امورنا ولا يمشى كلامه علينا

7 بننام كتير قوى وبنطنش كتير قوى وممكن نتنازل عن كل حاجه وفى لحظه صحوه نطالب بكل حاجه

8 كرامتنا غالية علينا اوى

9 على الرغم من اننا اذكياء بس فى ناس ممكن تمشينا

10 عاطفيين جدااا لابعد درجة حتى ان ممكن واحد يكون قاتل عيلتى كلها واما يتوب ويعتذر انسى واسامحه

11 شعب متناقض جداااا

12 عاوزين حرية كبيره لكن لا نسمح بيها للطرف المقابل

13 نريد ممارسة الديمقراطيه فى حين ديكتاتوريتنا الشديده

14 بنخاف من بعض قوى لكن وقت المحنه تلاقى اول واحد انت خايف منه هو اللى بيحميك

15 عندنا حلول لكل حاجه واى حاجه ومخارج لكل حاجه واى حاجه

16 عندنا ناس اساتذه استغلال موقف واساتذة انتهاز

17 راسنا ناشف حديد ودا يرجع لان فى عرق صعيد متغلغل فى كل راس فينا

الدول من حولنا

1 دول بتكرهنا قوى زى قطر وزى قطر وزى قطر

2 دول بتستغل الموقف زى امريكا وانجلترا واسرائيل وايران

3 دول بتخاف مننا مع اننا ضعاف بالنسبه ليهم اقتصاديا وامنيا وتسليحيا وكل حاجه فيها ايا ايا ايا ....زى برضو امريكا واسرائيل

4 روسيا على الرغم من ان فى ناس بتقول انها فيها فساد بس هى دوله فعلا مش حشريه وحياديتها عجبتنى قوى بصراحه

5 الدول العربيه كلها بتقوم مره واحده يعنى تونس تقوم وراها مصر وراها اليمن وراها الاردن والحكام العرب بيتربوا بسرعه قوى:)

وعلى فكره مش عيب ان عشان بلد قامت الباقى يتشجع ويقوم ..المسلم للمسلم كالبنيان المرصوص يشد بعضه بعضا

6 دول كتير قوى حسيت انهم ماشيين بمثل العجل وقع حموا السكينه

مميزات ثورة25 يناير

اسمحولى ان اطلق عليها ثوره.. لم تكن ثوره على الحكم بل كانت ثوره على عدة سلبيات ظهرت فى مجتمعنا

1 حمشى فى الشارع بعد كدا مش خايفة لان ولاد بلدى حيحمونى تخلصنا من سلبية الجيل باكمله

2 متهيالى كتير مش حيتحرشوا ببنات هم نفسهم كانوا بيحموهم وقت المظاهرات

3 خوفنا العالم كله ورعبناه بقدراتنا الخارقه حاجات كتير ظهرت مكناش عارفينها فينا

4 جيشنا جيش زى الفل ماشاء الله ومحترمين مش ناقصهم غير شويه معدات

5 بنصح كل واحد مدخلشى الجيش لازم يدخله لان فى الاوقات دى والله والله نفعنا جدا التدريبات اللى كانوا بياخدوها

6 على الرغم من انى كنت فاكره ان كتير بيكره الرئيس مبارك بس اكتشفت ان اكتر من 50 فى الميه بيحبوه وعارفه ان كتير مش حيتفق معايا بس انا متاكده من اللى بقوله على الاقل مش بيحبوه شخصيا بس بيحبو الاستقرار وخلاص

7 اخيرا قريت الدستور بتاعنا قراءة متفحصه مش مر الكرام اللى كنت بمر عليه فيه

8 عاوزه ادرس حاجات كتيره فيه مكنتش اعرفها فعلا

9 بقى عندنا نائب رئيس محترم فى رايى الشخصى وبصراحه كنت عاوزاه من زمان قد يختلف معى البعض وقد يتفق بس اقسم بالله انه مش نفاق نهائيا

10 بقى عندنا وزير محترم بيلبس بلوفرات مش بدل راجل مش متقنعر خالص نزيه جداا حاد جداا مهزب جداا وبرضو قد يتفق مع البعض وقد يختلف لكنه اتى فى حقبه خاطئه شويه

11 مجلس الشعب اللى كان كابس على نفسنا حينحل ان شاء الله جزء كبير منه واتمنى من الله يبطلوا فساد وعلى فكره ان كان مجلس الشعب فاسد فقد ساعدت سلبية الشعب نفسه فى فساده قوى واللى شاف انتخابات ونزل دوائر حيعرف لو كل واحد كان بيرفض الرشوه والفساد مكانشى حصل كدا

12 الدستور بتاعنا حيتشال منه ان شاء الله مادتين كانوا كابسين على نفسى قوى قوى ويمكن يتشال منه مواد تانيه كمان حيعملوا تعديل كبير

13 احمد عز اللى كان بيجيب الجزم بالطياره الخاصه غار وان شاء الله حياخد شر عقاب

14 جمال مبارك بوشه العكر ان شاء الله مشوفوش تانى يا رب ومش حيحكمنا باذن الله

15 مش حسمع قناه الجزيرة تانى خالص

16خلصنا من صفوت وبتوع الحزن الوطنى ان شاء الله لفتره طويله ولو ان الشاذلى حظه قشطه ونفد منها

17الشرطه مش حتدى حد على فاها بعد اليوم محدش حيسكت لها تانى وحتتعامل بكل احترام ان شاء الله

خسائر الثوره

1 اراوح بشريه كتيره فيهم شهداء ان شاء الله وفيهم ناس مش شهداء

2 ناس جاعت كتير كانت بتقبض باليوميه

3 عمليات كتيره اتأجلت ومرضى كتيره اطفال وشباب ملهمشى ذنب لا فى فساد ولا فى اصلاح اتبهدلوا

4 انقسامات فى الاراء كتير قوى

5 فىه خساره شخصيه ليا انا انى بصراحه مع احترامى للاخوان مبقيتشى بحبهم لاستغلالهم الظروف فى رايى الشخصى وربنا يهديهم

6 مصر خسرت اموال كتيره قوى بس عادى احنا اصلا كدا كدا بنخسر وبنتسرق كتير

7 ناس كتيره من الانقسامات بقيت تشتم وخسرتها سواء مؤيد او معارض

ملحوظه بطلبها من الشعب المصرى

1 يا ريت بلاش الشعب يريد اسقاط النظام خليها نحن نريد اسقاط النظام لان مش 6 مليون هم الشعب وحتى لو 85 مليون الا واحد عاوزين يسقطوا النظام برضو مينفعشى نحرم الواحد دا من ابداء رايه كمواطن

2 كتير قوى بنخون بعض وبنرمى تهم وبقى المعارضين اسمهم الرسمى عملاء ودا مش صح والمؤيدين اسمهم الرسمى بلطجيه ودا مش صح لان فى ناس معارضين مش عملاء وفى ناس مؤيدين مش بلطجيه

3 لازم نتقبل الراى والراى الاخر دون القاء تهم او اننا نمشى انت مش معايا تبقى عدوى

4 فى ناس فى مصر لا يهمها دستور ولا مجلس شعب ولا الريس يبقى مين ميهمهاش غير لقمه العيش والاستقرار فالدستور بالنسبه لها كتاب مبهم لا يستطيعوا قرأته ومجلس الشعب بالنسبه وقت منفعه بياخدوا من الاعضاء شويه فلوس تساعدها على المعيشه ورئيس الجمهوريه بالنسبه لها راجل طيب من الغلابه يتمنوا يسلموا عليه ويزودلهم20 جنيه فى المرتب

.........................................

تتفقوا معى او تختلفوا فهى اراء مختلفه ولكل شخص رأيه يحترم